Umunyabigwi Thierry Henry wamamaye muri Arsenal n’ikipe y’igihugu y’Ubufaransa, yagizwe umutoza w’ikipe y’igihugu y’abatarengeje imyaka 21 y’Ubufaransa
Nyuma y’uko umutoza w’ikipe y’igihugu y’Ubufaransa nkuru Didier Deschamps yongereye amasezerano azamugeza muri 2026, iy’abatarengeje imyaka 21 yaragijwe Umunyabigwi Thierry Henry wakiniye iki gihugu n’andi makipe meshi cyane cyane Arsenal yakiniye igihe kinini.
Ntabwo ahita atangira iyi mirimo kuko iyi kipe y’abatarengeje imyaka 21 ubu iri gutozwa na Sylvain Ripoll , gusa amasezerano ye akaba azarangira mu impera z’uyu mwaka w’imikino.
Thierry Henry w’imyaka 46, yasoje gukina umupira w’amaguru muri 2014 akiniye amakipe atandukanye ariyo: Monaco, Juventus, Arsenal, Barcelona na New York Red Bulls.
Yatangiye umwuga w’ubutoza muri 2016 nk’umutoza wungirije mu ikipe y’igihugu y’Ububirigi, 2018 aba umutoza mukuru w’ikipe ya Monaco, 2019 agirwa umutoza wa Montreal Impact, 2021 asubira kuba umutoza wungirije mu ikipe y’igihugu y’Ububirigi, kuri ubu akaba ari umutoza w’ikipe y’igihugu y’Ubufaransa y’abatarengeje imyaka 21 bikaba byitezwe ko ariwe uzayitoza mu imikino ya Jeux Olympiques.
